Gani Xhafolli
ZEMREN E KAM PLOT OQEANE
UNË JAM gani xhafolli
Zemrën e kam plot dritare
zemrën e kam plot unaza
zemrën e kam plot oqeane
zemrën e kam plot ajër
e plot diell
e kam plot dete
e plot zogj
e kam plot rrugë
e plot pemë
e kam plot lule
e plot dashuri
e kam plot bletë
e plot këngë
nuk e kam
asnjë miligram
urrejtje
KAM FLUTURUAR
SHPESH
Erdhi koha të kthehem
në atdhe e t’u marr erë luleve
+ pemëve në degë
shtëpinë e kam parë shpesh
ëndërr
kam fluturuar mbi
pemë e mbi kroje
duart e gjyshes i kam
vizatuar çdo javë
do të pi ujë çdo orë
do të ha pemë të vendlindjes
çdo ditë
diellin do ta fotografoj
çdo mëngjes
DASHURIA U DUHET
TË GJITHA FAQEVE
Shumë bëhem nervoze
kur në mbrëmje
ndalet rryma
e librat mbesin në terr
nuk ka faj Luli që
nganjëherë i ha gishtat
zemra ime kërkon
sa më shumë këngë
JAM shumë e vogël
për nervozë
dashuria u duhet
faqeve e të gjitha luleve
NJË PULËBARDHË
U SHPALL MIS
Me lule dhe diell
PRANVERA trokiti
në dritare
të gjitha vjershat
i hapën dyert
e përqafuan
mbi pemët rriten këmbët
e dallëndysheve
faqet e FLUTURAVE
morën bukuri
dielli mori pjesë
në festivalin e zogjve
një PULËBARDHË
u shpall mis
PËR UNAZË
JAM E VOGËL
Me sandale të bardha
e pres ditëlindjen
tetë pranvera i bëj
të martën
PRES shumë dhurata
prej HËNËS
pres shumë përqafime
prej nënës
pres edhe shumë lule
edhe shumë buzëqeshje
pres edhe shumë flutura
në oborr do të
fotografohem me krejt
klasën në dhomë
për unazë jam e vogël
A KA PUSHKË DIELLI
MË pyeti Lisa
kush e ruan natën
hënën
?????????????
dhe a ka pushkë dielli
?????????????
dhe a mërzitet pylli
kur ujku e ha ndonjë
dele te kroi
THASHË: shumë
mërzitet Lisë
DUA KËPUCË
TË BARDHA
DHE DUAR YLBERI
Një princeshë hyri në dhomë
me aromë molle
e përqafova
e përqafova
e përqafova
tha jam vjersha jote
DUA fustan të verdhë
dua këpucë të bardha
dhe duar ylberi
ZEMRAT E VOGLA
KËRKOJNË
në njërën dorë dua diell
në dorën tjetër dashuri
NËSE KE DËSHIRË
TË BËHESH MBRET
Nëse ke dëshirë
të bëhesh i bardhë
ha sa më shumë rrush
ha sa më tepër pite
nëse ke dëshirë
të bëhesh princ
thuaj HËNËS
çdo natë: të dua
nëse ke dëshirë
të bëhesh mbret
hapi duart
e përqafoje nënën
E TASH: SHES
PËRRALLA
JAM TRIM
Nuk e harroj
JAM tutë shumë
edhe prej një mize
të kalit edhe prej
një peshku
më kujtohet
JAM lagur në shtrat
prej një qeni të vogël
e tash: shes përralla
JAM trim mbi trima
NUK DI PSE GAFORRJA
EC MBRAPSHT
E kam pyetur gjyshin
më ka thënë NUK DI
e kam pyetur një vajzë
në Francë
PYETE LUMIN
në vendlindje e
kam pyetur një ditë
GAFORREN në
Danimarkë
nuk di pse iku prej meje
kur unë nuk jam polic
FUSTANI ËSHTË
I BUKUR EDHE
VETËM ME NJË +
Këmisha e re është e mirë
edhe vetëm me dy pulla
e fustani është i bukur
edhe vetëm me një +
gishti është princ
edhe pa unazë
dora është mbretëreshë
kur e thërret një dorë tjetër
dhe i japin çokollata
njëra tjetrës
këmbët janë princesha
kur puthin rërën
dhe i puth deti
DIELLI SHKRUAN
PROZË NË FAQE
Kur e përqafojmë gjyshen
në mbrëmje
zgjohemi më të ëmbël
në mëngjes
e dielli shkruan prozë
në faqe
që mund të lexohet
vetëm me puthje
edhe hëna shkruan poezi
me buzë moderne
PJESHKAT I KA
ZËNË GJUMI
Pjeshkat në katund
i ka zënë gjumi
presin dorën time
të butë
nw ëndërr i lexojnë
vargjet prej rëre
gjethet këqyrin
mos po më shohin
në rrugë
u kujtohet kur isha
zog mëndafshi në degë
dhe ylber në mollë
JAM BËRË SI
LEJLEK I LODHUR
Kam kohë tepër pak
të shkruaj vjeshta
është ulur mbi flokët e mia
dhe u jep krejt ngjyrë
bryme
jam bërë si lejlek i lodhur
ENDE nuk e kam harruar
MOLLËN në Toplicë
të gjyshit e gjyshes
më kujtohen të gjitha
dyert me zog flamuri
JAM lodhur shumë
prej malit në mal
prej trenit në tren
më duket 1000 vjet i kam
KUR DALLËNDYSHET
NISEN PËR UDHË
Kur dallëndyshet nisen për udhë
asnjë vjershë nuk e merr gjumi
kërkojnë ujë kërkojnë ajër
u them: mos u mërzitni
përsëri do të vallëzojnë
mbi kordelet e luleve
dhe duart e hapura
DËSHIRË GJATË NJË
NATE KUR FLUTURA
ISHTE NË MËRGIM
Ah sikur ta kisha një kalë
të bardhë
një kalë të bardhë
që fluturon përmbi pyll
e përmbi fusha
ah sikur ta kisha një mollë
një mollë të artë
një mollë të artë
një mollë të artë të Çamërisë
ose të Shkodrës
do të isha nisur
drejt fluturës
DY JAVË KA QARË DEGA
Mos ua thyeni pemëve duart
sepse mërziten tepër gjethet
e nuk i merr gjumi
dhe qajnë në heshtje
edhe shiu nuk e ndjen
veten mirë
një qershi është ankuar
shumë
kur një djalë ia ka thyer
pesë gishta
dy javë ka qarë dega
KA FLUTURUAR
EDHE UJKU
Dikur kanë fluturuar
kuajt
edhe kaprojtë
edhe devetë
ka fluturuar edhe ujku
kanë fluturuar edhe delet
lisat kanë folur
kanë folur edhe pulat
kështu kanë thënë
gjyshet kështu thonë
edhe përrallat
+ VIZATON
DALLËNDYSHE
Të gjitha pemët në oborr
Janë bërë NUSE me lule
Nuse të bukura
Nuse të bukura
Nuse të bukura
Genti i mirë çdo ditë
U thotë diçka fluturave
Kur pinë ujë dhe fluturojnë
+ vizaton dallëndyshe
Me pika
+ u këndon e u këndon
Nganjëherë e PYET nënën
Nganjëherë e PYET gjyshen
Pse nuk kam motër
Pse nuk kam vëlla
DASHURIA ËSHTË
ME SHUMË ZEMRA
Dashuria është e ëmbël si molla
E përqafon një ylber të vogël
Kënaqesh
Dashuria është me shumë zemra
I duhet lumit
I duhet detit i thua MERRE
Me dashuri e hap derën
Kur vjen dikush dhe i qet kafe
Me dashuri zgjohesh
Në mëngjes për një përqafim
Të diellit
E katër përqafime të nënës
Dashuri është edhe kur mbyll
Derën kur shkëlqen hëna
ÇDO DITË
FLET ME DIELL
Kur erdhi Skënderbeu
Në Prishtinë
Motra lindi djalë
Emrin e mori Trim
Skënderbeu në KALË
Diçka i thoshte dielli
HIJE I KA SHPARA
KALI i këqyri retë
E kishte marrë malli
Për krejt Dardaninë
ENDE s;e merr Gjumi
As KALIN as Gjergjin
të flet me DIELLIN
DIKUR EDHE
TREGIMET PLAKEN
Sigurisht e keni parë
Peshku ha pa duar
Noton pa këmbë
Dimrit nuk di a nerth shumë
Dhe a ia di emrin botës
Edhe unë kam qenë peshk
Në barkun e nënës
Tash jam gjysh me mjekër
Edhe unë çuditem qysh i
Shkruaj vjershat e reja
E di: dikur edhe tregimet plaken
Pikëpyetjet a i lexon dikush
Plaket edhe banesa dikur
Plaket edhe nëna
Edhe makina e shkrimit
Dielli pikëpyetje a plaket
KUR FLUTUROJNË
BUZËQESHJET
E njoh një vajzë
I ka dy bylbyla
Në zemër
Këndojnë kur ajo
E vizaton diellin
Dhe mbjell lule
Këndojnë kur ajo
E shkruan fjalën
atdhe
këndojnë kur nëna lind djalë
dhe fluturojnë buzëqeshjet
UJKU ËSHTË I MIRË
NA JEP EDHE LOPA
Kur shkoj në pyll
Kam frikë mos po më sheh
ujku
e tuten faqet natën
e tuten këmbët ditën
Ujku e ka gojën e madhe
Kësulëkuqja më ka thënë
E në TEATËR të KUKULLAVE
Ujku është i mirë
Na jep edhe topa
edhe në çerdhe dhelpra
është e mirë
nuk i ha Pulat
GJEOMETRIA
E MIRË
Matematikën nuk e dua Aspak
Numrin 5 PO + numrin 7
Abetarja e do numrin 8
+ numrin katër
gjyshja e do numrin 1
gota e do çajin me sheqer
+ lugën e vogël
nuk e di a e do dikush ZERON
GJEOMETRIA është e mirë
Hyn në rreth me ndonjë vajzë
Luan: MACJA E MINI
DIÇKA MË KA DHËNË
NJË KËRMILL
Jam munduar shumë
Ta shkruaj një vjershë
Të verdhë në vjeshtë
I kam lutur të gjitha
Lulet të më ndihmojnë
Edhe lumin
Edhe hënën
Diçka më ka dhënë deti
Diçka më ka dhënë pylli
Diçka më ka dhënë kërmilli
Diçka një patë e egër
Diçka më ka dhënë
Një vetull e një vajze
Diçka një krah i një fluture
Diçka më ka dhënë
Një buzëqeshje xheloze
VERA ËSHTË
KARROCË DORE
Vera është karrocë dore
Plot diell
Plot pemë
Autobusët çdo ditë
I nis për në det
I zbukuron si bukë furre
Faqet me pesë vjeshta
Me buzëqeshje i pjek
Domatet boronicat
Çadrat i hap mëngjesi
Uji vakët duke i këqyrë rrezet
NUK di kush këndon më bukur:
Gurra apo deti
I THEM:
MOS LUAJ ME HILE
Kur i ujis pemët
Më kënaqen duart
Kur luaj me top
Më kënaqen këmbët
Kur më thërret Vala
Në telefon
Më kënaqet veshi
E më kënaqet goja
Kur luaj e humbi
I them lejlekut
Mos luaj me hile
E Valës jo jo
U ERDHI KEQ
Dielli i puthi
Lulet shumë
E shumë E shumë
Nga PUTHJET
U thanë e u thanë
I erdhi pak keq
Shiut
Loti lagu lotin
BUKURI KANË
FAQET
Kur ylli e sheh syrin
E Hënës
Rritet e rritet
E kur flet
Edhe katundi i duket
Më i mirë
Edhe gjethet në pyll
Bukuri kanë duart
Bukuri kanë faqet
YLLI është dukat
HËNA është dukat
Në dimër i kanë ditëlindjet
GJYSMËN E PËRRALLËS
E MORI MOTRA
Kujtimet i ruan molla
në oborr dhe syri i gjyshes
ujku i preu në fyt dy dele
bora mori ngjyrë të kuqe
pikëllimi e mbylli derën
gjyshi e nisi një përrallë
tha pak është e lagur
e ndamë: gjysmën e mori motra
e gjysmën e mora unë
në fund e vrau ujkun
duke hyrë në pyll
ÇDO MËNGJES
ISHTE I EGËR
Më kujtohet kur
i premë plepat
dhe i shitëm për bukë
u mërzitëm shumë
Unë dhe NANA
një natë pashë ëndërr
u kthyen e gjelbëruan
në oborr
natën kishte ra borë
e madhe
stufa e hollë e kthente
tymin
motra kërkonte tambël
e nuk kishim
çdo mëngjes ishte i egër
një pjesë e atdheut
gjëmonte
NDOSHTA EDHE KËNDOJNË
KUR I LANË SHIU
Pemët nuk vrapojnë
flenë gjithmonë në këmbë
shohin mirë me degë
e me gjethe
më duket nuk narthin
kur ka borë e fryn
nuk di a dinë të flasin
a i harrojnë kujtimet
ndoshta edhe këndojnë
kur i lanë shiu i butë
edhe kur ikin dallëndyshet
kanë bukuri
EDHE KËPUCËT I KA
PASUR SI BAKLLAVË
E DI: lumturia ka krahë
e unë nuk kam
më kujtohet në klasë të tetë
kam fluturuar
ka fluturuar edhe një vajzë
në klasën e shtatë TRE
kurrë nuk e di a ka bërë
ajo dritë në katund APO hëna
E DI: në shkollë ka qenë MIS
EDHE këpucët i ka pasur
si BAKLLAVË
ËMBËLSIRË NA
SJELL DIELLI
Kur motra përgatit
drekën
të gjitha vargjet e mia
ulen në tavolinë
dhe hanë së bashku
me rreze
ujë na sjellin retë
ëmbëlsirë na sjell dielli
kur nëna përgatit darkën
hëna u jep bukuri duarve
MBI TAVOLINË
PUSHOJNË GOTAT
DHE TELEFONI MOBIL
Tavolina i ka katër këmbë
duart i mungojnë
edhe sytë
tutet pak kur e presim
bukën me thikë
është e mirë kur hamë pite
e rrush
mbi tavolinë pushojnë
gotat dhe telefoni mobil
kur vjen dikush
i zbukurohet faqja
mërzitet kur mungon tambli
e mungojnë pemët
për festë disponohet
VJERSHAVE
U RRITET BUKURIA
Flokët i rriten Lises
dhëmbët i rriten Gentit
duart i rriten hënës
këmbët i rriten Yllit
e pëllumbave u rriten
krahët
plepave u rriten gjethet
dardhave u rritet bishti
mua më rriten vjershat
vjershave u rritet bukuria
LUMI IA LANTE FAQET
Një mollë ma mori hëna
prej dore dhe ia dha një vajze
që vizatonte lule
mbi një copë dielli flokët
ia krihte era me muzikë të lehtë
lumi ia lante faqet
MBI një mollë TJETËR
Isa e puthte flamurin
në mëngjes ia tregova ëndrrën
LULES në telefon
në mbrëmje erdhi Fatosi
prej Berlinit
u hapen të gjitha dritaret
E ËMBËL JE ÇDO ORË
I thashë një vajze
e mirë je çdo ditë
e ëmbël je çdo orë
e bukur je çdo minutë
sepse i ke shtatë vjet
dora jote i pëlqen
çdo molle
DUHET TË BËHENI GATI
PËR PËRQAFIME
Një ditë një princeshë
do të vijë nga një planet tjetër
e do të ndalet përpara hotelit
ILIRIRIA
do të sjellë shumë pëllumba
për vajza
do të sjellë shumë kuaj
për djem dhe një Libër
me Përralla nga një hënë tjetër
do të këndojë krejt ndryshe
do të vallëzojë krejt ndryshe
në fund të këngës
do të fluturojë mbi Prishtinë
e përsëri do të kthehet
duhet të bëheni gati
për përqafime
TEMA: UNË MBLEDH
KUMBULLA
Unë mbledh kumbulla
unë mbledh dardha
secila më duket vjershë
gjyshes i pëlqejnë
kur ia sjell dora ime
unë mbledh edhe lule
sepse i pëlqejnë LULES
në telefon më ka thënë
je i mirë për film
një fletore e kam plot
me zemra
JAM E VOGËL
PËR SHËTITJE
Kur një vajzë më tha
majmun
e luta: a dalim
të shëtisim bashkë
sepse ti je e bukur
më tha JAM e vogël
për shëtitje
ajo shkoi te shoqet
unë shkova në pyll
i tregova një kaçube
VJERSHAT DO TË
ISHIN MË NERVOZE
Sikur të mos kisha pemë
në oborr
më pak do të kishte zogj
më pak do të kishte këngë
edhe vjershat do të ishin
më nervoze
dhe me më pak bukuri
THASHË SHUMË
PO MA DO ZEMRA
Kur u kthye nëna
nga spitali
vesha fustan
me pulëbardha
THA: edhe një motër
ta solli LEJLEKU
me hënë në faqe
e përqafova dhe
e përqafova
THASHË: shumë
po ma do zemra
HARROJNË
QË JANË TË MIRA
Edhe fluturat janë
xheloze
shpeshherë e harrojnë
lumin me lule për rreth
nganjëherë nuk dinë
as të fluturojnë në fushë
HARROJNË që janë
të MIRA
THA ËSHTË VËLLAI
IM I VOGËL
Në rrugë e gjeta
një copë letre
dikush e kishte
vizatuar një zog
e mbylla në zarf
një vajze të përlotur
i thashë
sepse mërzitet shumë
për dorën tënde
THA: është vëllai im
i vogël
DALLËNDYSHET
NUK E PRANOJNË
BORËN PËR MOTËR
Dallëndyshet nuk e pranojnë
dimrin për vëlla
nuk e pranojnë as borën
për motër
e urrejnë fort ujkun
që i ha delet
e urrejnë shumë dhelprën
që i ha pulat
janë me të gjithë ata
që kërkojnë liri
KAM HARRUAR
SI DUKEJ SHTËPIA
E VJETËR
Kam harruar si dukej
shtëpia e vjetër
me dy dhoma e një kuzhinë
me pak lugë e tri dritare
do ta pyes Agim Devën
dhe tash e shoh pak
Shtëpinë e Re
nuk di a ka dritë mbi kulm
nuk di si duken pikturat
e mia në terr
dhe a mërziten
që nuk i shoh mirë
të martën do të shkoj
në spital
kam menduar se do të shihja
edhe pa dritare
nuk di si duket as liria
as fletorja e parë
e bukurshkrimit me një zog
MË KA MARRË
MALLI SHUMË
Më ka marrë malli shumë
për duart e vogla të Lises
dhe për gishtat e butë
të Gentit
uji nuk më pihet
buka nuk më hahet
nuk di si duken faqet
e ëmbla të Petritit
dhe si duket hëna
në Berlin përrallat
nuk kanë bukuri
në banesën numër 7
JANË XHELOZE
KUR I HARRON
DORA DHE SHIU
Thonë lulet nuk guxojnë
të çelin natën
tuten shumë për gjethe
mjegulla është shumë
e mërzitshme
lulet shohin kur dikush
është i keq
lulet prej vajzave
hidhërohen më pak
janë xheloze kur i harron
dora dhe shiu
nganjëherë natën
nuk i merr gjumi
NUK JAM POET
I MIRË
Askush nuk i pyet lulet
e blirit
PSE çelin edhe pse
erën e kanë të mirë
askush nuk i pyet
askush nuk i pyet
PSE fluturojnë
edhe pse janë të mira
as unë kurrë nuk i kam
pyetur gishtat
pse janë nga PESË
SHTËPIA ËSHTË
NJË PIKË E VOGËL
Shtëpia ime është një pikë
e vogël në oborr
e rruga është një vizë
e hollë
fluturës i pëlqen
edhe shtëpia
edhe rruga
NËSE TË PËLQEN
NDONJË ËNDËRR
SHËNOJE NË DITAR
Mos i mbyll dritaret
mos e mbyll as telefonin
para orës 22
kur t’i kryej detyrat e fizikës
do të të thërras nesër
në orën e tretë kemi
matematikë
ti je + e unë –
ti je X e unë Y
mos e harro aparatin
sepse nesër çel një lule
e verdhë për ty
kur të dalim në klasën
e tetë
do të gëzohet gishti yt
për ditëlindje
nëse të pëlqen ndonjë
ëndërr
shënoje në ditar
KAM FAT SEPSE
KËNDOJ PËR DETIN
Kam shumë fat
sepse zgjohem herët
e dielli më bën të bukur
kam shumë fat
sepse çdo mbrëmje
e ha nga një mollë
dhe lexoj
kam shumë fat
sepse e dua gjyshen
dhe këndoj për detin
shumë lule në kopsht
çelin për mua
NJË DJALË I VOGËL
E VIZATON LIRINË
ÇDO MËNGJES ZOGJTË
KËNDOJNË NË OBORR
MBI DEGË E MBI PEMË
VJERSHAT JANË FLUTURA
JANË LULE
DIELLI ËSHTË NJË LIBËR
MBI RE
E LEXOJNË YJET
E LEXON AJRI
HËNA RAJMIND E NXJERR
NGA ÇERDHJA E ZOGUT
NJË KLITHMË
JO MË SHUMË
NËN MOLLË
NJË DJALË I VOGËL
E VIZATON LIRINË
ËNDËRR SHUMË
E RRALLË
Dora e majtë e vodhi
hënën dhe e mbylli
në kuti
dora e djathtë e vodhi
diellin dhe e fshehu
në valixhe
nata u mërzit shumë
dita u mërzit edhe më
shumë
një princeshë e bardhë
THA: zgjohu vogëlush
dhe hape derën e ëndrrës
po të pret Lulja
KUSH E GJEN
I KA NJËQIND
LULE DHURATË
LAJM: NË pyll ka humbur
një vajzë
ai që e gjen i pari
i ka njëqind lule dhuratë
i ngjan shumë Kësulëkuqes
sheh mirë e dëgjon mirë
sandalet i ka të kuqe
telefon mobil nuk ka me vete
pylli është tepër i madh
thonë ka edhe ujq
është e vogël e ka harruar
udhën
nuk di a mund të shihet
nga helikopteri
duhet të kërkohet nëpër pyll
edhe me altoparlant në dorë
SECILI E KA
FATIN E VET
Duhet ta dini edhe tash
asgjë nuk u duhet kapela
e huaj
asgjë nuk u duhet koka
e huaj
i keni sytë
i keni duart
i keni këmbët
secili e ka rrugën e vet
secili e ka yllin e vet
pi ujë kur të pihet
ha bukë kur të hahet
mos e pyet askënd
a të nisem
mos e kërko lumturinë
larg
e ke më afër se këmishën
dhe gotën me ujë
ËNDRRAT I SHEH
PA LULE
Shpeshherë ulemi në shkallë
e presim motrën mos po vjen
është larg
shumë larg
ka thënë një ditë
do të kthehet
ëndrrat i sheh pa lule
në mërgim 48 muaj
nuk e ka parë fletoren
e matematikës
që e ka lënë mbi tavolinë
as fotografitë e gjyshes
E HËNGRI
UJKU NË MAL
Me motrën i kemi ndarë
yjet dhe pemët
edhe nënën e kemi ndarë
përgjysmë
edhe hënën EDHE diellin
për një dele një javë
kemi folur
më kujtohet
e hëngri UJKU në mal
e mirë ka qenë
shumë e bardhë si bora
e diel ka qenë ajo ditë
lotët lagën kamishat
MËRZITEN DRITARET
EDHE DY PULAT
Çdo ditë mendon
kush po hyn e kush
po del
mërzitet kur mami
shkon në punë
+ kur unë shkoj
në shkollë
MËRZITEN edhe DRITARET
edhe dy pulat
+ MËRZITET kafazi
me katër bilbila
edhe oborri mërzitet
MË DUKET SE
E KUPTOI LOJËN
Flaka vizaton tinëz
zemra nëpër mure
ruhet shumë se mos
po e sheh dikush
NJË ditë e kam parë
UNË buzëqeshi vetëm pak
i erdhi keq prej syrit tim
sa herë më sheh
e ul kokën e largohet
shpejt si vetura
një ditë i thashë:
nuk shoh asgjë
pa syza
JELEKUN E KANË
ME KATRORE
Një natë e pyeta hënën
a ka breshka në Jupiter
+ a u tregojnë gjyshet
përralla
i thashë: unë i kam
dy breshka të mira
i kam gjetur në pyll
Lisa u thotë vetUra
JELEKUN e kanë
me KATRORE
E PRET PRINCI
ME NJË LULE
E Bukura e Dheut
ndoshta është në krah
të një zogu ose është
në fund të një përralle
ndoshta është në një copë
hëne ose diku
thellë në pyll ndoshta
është në çadër të shiut
e pret princin me një lule
e një mollë
JANË NUSE
TË BUKURA
TË DETIT
Pishat janë elegante
rriten në mënyrë elegante
drejt reve
trupin e kanë të blertë
edhe xhemperin
dimrit nuk kanë nevojë
për stufë
nxehen edhe me pak diell
nuk fluturojnë sepse
u pëlqen pylli
janë nuse të bukura të detit
janë motra të blerta
të shegëve
janë piktura moderne
në këmbë
DHJETË GISHTA
JANË SA NJËQIND
DRITARE
Librat shqetësohen
kur i harron syri
e kur i harron dora
edhe vera u duket me borë
edhe nata u duket
me pluhur
një dorë u duket sa një
kopsht me zogj
dhjetë gishta janë
sa njëqind dritare
EDHE MBRETIN
DO TA THËRRASIN
PËR DITËLINDJE
Për VALËN E LUMIN
nuk do të ketë pikë
as pikëpyetje
do të fluturojnë
e rriten bashkë
si dy lule
në pranverë edhe mbretin
do ta thërrasin për ditëlindje
EDHE MË I BUKUR
SE NARCISI
GUXOJ të them
jam më i madh se Shekspiri
guxoj të them
shkruaj më bukur se Balzaku
dhe Ezopi
SEPSE JAM I VOGËL
guxoj të them
vizatoj më mirë se Pikaso
e këndoj më bukur se Elvis
Prisli
SEPSE JAM I VOGËL
guxoj të them
jam më elegant se Romeu
dhe më i bukur se Narcisi
guxoj të them
jam edhe më trim se
Gjergj Elez Alia
EKZISTON NJË
MOLLË QË FLET
Në një kopsht ekziston
një mollë që flet
kush e gjen
e pret lumturia
e në pyll ekziston
një flutur me pika
kush e sheh ditën
natën bëhet hënë
dhe e përqafon çdo faqe
që i pëlqen
gjyshja më ka thënë
një vajzë ende e kërkon
DIELLI NUK PI DUHAN
Dielli është i bukur
sepse nuk bën tym
edhe hëna është e mirë
cigarja e gjyshit nuk
u pëlqen mureve
nuk u pëlqen luleve
nuk u pëlqen dritareve
nuk u pëlqen perdeve
dielli nuk pi duhan
hëna nuk pi duhan
as lepuri nën kaçube
as vjershat e mia
yjeve nuk u vjen era
e gjyshit po
E DUA EDHE NJË PRINC
EDHE NJË PALLAT
MORTA THA: dua lule hëne
dhe fustan që këndon kur bie borë
+ kur shiu bën muzikë mbi ujë
e dua edhe një zog prej molle
që fluturon
e dua edhe një princ
edhe një pallat me dritare
prej dukati
qeshi gjyshja
qesha unë
NATA THA: SHKO e fli
zemër e vogël
kërko diçka edhe prej yjeve
edhe prej luleve
EDHE KJO ËSHTË
VJERSHË
Edhe kjo është vjershë
dikush ulet mbi një letër
dikush e mbyll dritaren
dikush pi ujë pa gotë
dikush i ndjek mizat
nëpër dhomë
dikush i gjuan fluturat
dikush vizaton gaforre
dikush shkon në spital
dikush i lyen flokët me gell
dikush mbledh gjethe
në oborr
edhe kjo është vjershë
LETËR MOTRËS
NË GJENEVË
E vogël ishe
kur të puthte era
kur të buzëqeshte
shiu
nën kumbulla dhe degë
fustanin e kishe
me ngjyra
e vogël ishe atëherë
kur u ke kënduar
gjetheve
dhe një cope buke
flamurin e ke vizatuar
tinëz në shuplakë
mos i harro ëndrrat
mos e harro nënën
as hijen tënde të vogël
MË KUJTOHET kënga JOTE:
ende ka shumë borë
NJË VAJZË THA
NUK ËSHTË HIJA
JOTE
Më duket interesante
hija ime kur e shoh në mur
dhe në rrugë
interesant: unë eci ajo ecë
unë këndoj AJO hesht
unë vrapoj ajo vrapon
më erdhi shumë inat kur
një vajzë e shkeli e tha
nuk është hija jote
dhe iku prapa një veture
NË VEND TË NËNËS
I FLAS HËNËS
Nëna ime ka qenë NUSE
dëshmori
ende e ruaj shishen e saj
të ilaçeve dhe tri pulla
në një kuti druri
e para është e zezë
e dyta është e kuqe
e treta është e bardhë
e kisha një nënë të bardhë
tash jam jetim
në vend të nënës i flas
hënës
ajo e lexon LOTIN
në dritare
NUK HARXHOJ
ASNJË LEK NË KINO
Më mirë është për mamin
që jam i vogël
sepse këpucët kushtojnë
më lirë edhe kapela
+ bukë ha më pak
nuk harxhoj asnjë lek
për kinema
as për sport
një mollë është mjaft
për darkë
edhe një gjysmë gote tambël
mami e ka rrogën e vogël
mirë është që edhe unë
jam i vogël
EDHE HËNA
ËSHTË E MIRË
Dielli është i mirë
sepse i than këmishët
në tel
edhe era është e mirë
makinën e larjes e dua
sepse i ndihmon nënës
edhe patatet janë të mira
edhe rrushi i bardhë
i mirë është
edhe mishi i pulës
të mira janë edhe vjershat
e Xhani Rodarit
dhe të Agim Devës
edhe hëna është e mirë
i përngjan nënës
kur e përkund djalin
NIPI ËSHTË I MIRË
EDHE KUR LAGET
NË SHTRAT
Nipi është lumë i kaltër
rrjedh nëpër zemër të gjyshit
është pëllumb i butë
që fluturon prej faqes në faqe
nipi është edhe zog i bardhë
sepse ka gjyshe
nipi është ylber me ngjyra
kur pi tambël të nënës dhe
e merr gjumi me këngë
e ëndrra e rrit
me buzëqeshje të hënës
dhe të degëve me pemë
nipi është i mirë
edhe kur laget në shtrat
KAM TË DREJTË
TË GËZOHEM: E KAM
QENIN E MIRË
Një mesazh e kam marrë
prej PRANVERËS
më ka pyetur: A PO rritesh
në dimër dhe a po të pëlqen bora
interesant
e ndjej veten shumë mirë
kur më pyet dikush
e dikush më thërret
unë kam të drejtë
të gëzohem çdo ditë
e kam qenin e mirë
i kam peshqit e mirë
e kam telefonin e mirë
TË MARTËN E DUA
SEPSE E KA DITËLINDJEN
QENI
Të martën e dua sepse
e ka ditëlindjen qeni im
Keti
tash i ka dy muaj
i them ulu: ULET
mishi i pulës i pëlqen
edhe qumështi i deleve
nuse nuk ka sepse është
i vogël
një natë e shikonte
me kureshtje hënën
e fotografova
edhe hënën
edhe qenin
FIJET E BARIT
U PËLQEJNË GISHTAVE
Nuk do të mërzitem
që nuk kam këmishë
është mirë sepse
po shkrihet bora
është mirë sepse shiu
është më i ëmbël
dhe lulet çelin të mira
nuk kam problem
edhe pse këpucët i kam
të vjetra
fijet e barit u pëlqejnë
gishtave
çdo ditë do të dal në pyll
prej mamit do të marr leje
po edhe prej diellit
BRYMA NUK MERITON
ASNJË SHPËRBLIM
Delet meritojnë shpërblim
për qumësht
pylli për oksigjen
vajzat për buzëqeshje
dhe bukuri
edhe zogjtë që këndojnë
retë meritojnë shpërblim
për shi dielli për rreze
djemtë për duar të bukura
edhe ora e dorës nuk gabon
bryma nuk meriton asnjë
shpërblim e asnjë vjershë
I PËLQEJNË DRITARET
KAH DIELLI
Në dhomën time të vogël
rritet një lule e vogël
kurrë nuk e harroj pa ujë
i pëlqejnë dritaret
e kthyera kah dielli
kur shkoj në katund mërzitet
kur kthehem e pyes:
a ke parë ndonjë ëndërr
të ëmbël
dhe i lëshoj muzikë rep
dhe i sjell ujë me gotë
LULEN e kam edhe motër
LETËR NGA AZILI: 1999
Pikëpyetje a do të kthehem
në vendlindje
të gjitha pemët mungojnë
edhe shtëpinë e vogël e dogjën
vëllanë me libër në dorë e vranë
guri i nënës ende nuk dihet
pikëpyetje a do të kthehem
në vendlindje deri sa
të gjelbërojnë malet
e të çelin lulet
dielli ende është i fortë
mbi pemë e mbi çerdhe
dallëndyshet janë lodhur
nga tymi e bora
plepat kanë mbetur pa
asnjë lejlek
KUJTIMET IA MBULON
BORA
Një këmbë e humbi në mal
e mali ia fali një tjetër
atëherë ishte luftë e madhe
dhe askush nuk i tha
faleminderit
që na e solle pak diell
Trimi pa këmbë jeton
në një shtëpi pa kulm
kujtimet çdo natë
ia mbulon bora
NË KRAJË E DUA
EDHE NJË VAJZË
Në Ulqin shkoj të marr
bukuri dhe t’i them DETIT
1000 herë të dua të dua
të gjitha barkat do t’i mbushi
me PUTHJE
në Ulqin shkoj të marr
bukuri
e dua çdo kokërr ulliri në degë
e dua çdo valë e kokërr rëre
në Shtoj
në Krajë i dua të gjitha
lulet e të gjitha gjethet
E PËRQAFOVA
EDHE NJË HERË
I thashë një vajze je pite
tha: pse nuk më the je
edhe bakllavë
më nuk fola hiç
e përqafova
më pyeti: a jam e ëmbël
e përqafova edhe një herë
shoferi i autobusit
ma nxori gjumin tha:
JEMI NË BERLIN
Genti vrapoi kah unë
ZOGU QË KËNDON
NË OBORR TË MBRETIT
Për ku je nisur kaq herët
e pyeti ZOGUN malit
MË KA HUMBUR një vëlla
i vogël e motrat po mërziten
shumë
për herë të fundit ka pirë ujë
te Kroi i Mjellmave
DHE loti i rrodhi mbi degë
PYLLI THA: MOS qaj më
ai këndon çdo ditë
në OBORR të MBRETIT
EJA TË LUAJMË PAK
SEPSE TË KËPUTET MËRZIA
Më kujtohet kur më vdiq gjyshja
dy dele na i hëngri ujku
+ ishte tepër ftohtë
një shoqe e klasës më tha
EJA të luajmë PAK sepse
të këputet mërzia
MIRË që nuk i thashë
mërzia nuk është pullë
as nuk është mollë
gjysma e lotëve ishin
për gjyshen
e gjysma tjetër për delet
MË E MIRË NJË DARDHË
SESA KATËR SHOQE
TË NËNËS
Më duket se jam pak egoist
e ha një mollë pa i thënë askujt:
merre pak + kam dëshirë të hypi
i pari në autobus
shpeshherë motra më kritikon
nuk di pse veproj në këtë mënyrë
më tepër më pëlqen dhoma
e pritjes kur ka pemë
sesa shoqet e nënës sepse
më lodhin kur flasin
me kundrina të drejta
e të zhdrejta
më e mirë është një dardhë
sesa katër shoqe të nënës
MUNGONTE EDHE
GOTA PËR UJË
Kur gjyshja ka qenë e vogël
nuk kishte xhemper
nuk kishte pulla
nuk kishte këmishë
mungonte kripa
mungonte dielli
mungonte mielli
mungonte sheqeri
për një kafe
nuk kisha këpucë
as libër të leximit
mungonte stufa
mungonte edhe
gota për ujë
PO TË DUA
BËHEM EDHE PIANO
Po të dua bëhem edhe piano
dhe eci me një mollë
nëpër fushat e pentagramit
po të dua bëhem edhe piano
më pëlqejnë gishtat kur
më përqafojnë me nota
po të dua rritem dhe
zvogëlohem
u them drenushave
EJANI sepse
më duheni për lojë
LOPA ËSHTË PAK
EDHE FILOZOFE
Mjafton që i gjen krojet
kur dihet të pi ujë
mjafton që vetë kthehet
në shtëpi për çdo mbrëmje
mjafton që di të ec e të flejë
është pak edhe filozofe
kur ha mirë dhe përtypet
mjafton që na jep një kusi
tambël
në mëngjes e një e kur hëna
u thotë fluturave
të bëhen gati për gjumë
mjafton që është e butë
EDHE DIELLI NUK
PO MË DUKET I MIRË
Më ka marrë malli shumë
për duar edhe për faqe
edhe për gishta
NËNË nënë
kur kthehet BABI
kur kthehet
kur kthehet
edhe dielli nuk po më
duket i mirë
JAM SHUMË I LIRË
KUR SHKRUAJ EDHE
ME DY GISHTA
Breshka e cila pret shiun
më duhet për një titull
vjershe ose për një prolog
të vogël të një proze
mund të shkruaj edhe
në shkallë edhe afër
një libri të huaj
nuk më mungojnë
as mizat as gaforret
besim të madh kam
vetëm në oksigjen
dhe në hidrogjen
kur kthehen lejlekët
e ëndrrave
i hapi dritaret e ditës
jam shumë i lirë
kur shkruaj
edhe me dy gishta
QESHI PËRSËRI
PAK MË SHUMË
Dola një ditë në qytet
kërkova xhemper për dele
e nuk gjeta
kërkova edhe këpucë për qen
një shitëse më tha
kemi vetëm për vajza
e qeshi
E PYETA: a duhet të paguaj
diçka PËR QESHJE
Qeshi përsëri pak më shumë
tha: jo jo jo SEPSE JAM
tezja e djalit tënd
e pimë nga një kafe
ekspres
NË VJERSHË LEJLEKU
KËRKOI AZIL
Pa zhurmë iku vera
dritaret i mbylli vjeshta
dhe u këqyr në pasqyrë
era pyeti: kur e kam
ditëlindjen
edhe dy gjethe u këputen
nga dega
në vjershë lejleku kërkoi
azil
e dallëndyshja në prozë
GJITHÇKA MË
INTERESON + PYES
Nuk di kënd e ka pasur
mësues Eskili
Helena a ka qenë e bukur
kur ka qenë e vogël
Teuta me çka e ka hëngër
bukën
Ajnshtajni a ka qenë i mirë
në klasën e parë
nuk di a mërziten peshqit
kur bie borë
dhe a narthin shelgjet dimrit
gjithçka më intereson
MAKINA E LARJES ËSHTË
MOTYËR E KËMISHAVE
Makina e larjes është motër
e kamishave dhe e xhaketave
është motër e fustaneve
i lan me ujë të nxehtë
e shkumë të bardhë
e në tel hollë u këndon dielli
dhe era e butë
edhe Mëngjesi thotë
e kam motër edhe Mirëdita
KUSH E KA KRIJUAR
MIZËN E PARË
Shpeshherë kam menduar
shpeshherë edhe kam pyetur
pse nuk rrëzohen retë
dhe pse nuk duket bora në qiell
kush e ka krijuar mizën e parë
që fluturon
+ pse gaforrja noton më ndryshe
është interesant
pse bleta kurrë nuk e harron
banesën
dhe derën e vogël
pse dielli nuk afrohet pak
më afër kur resh borë e madhe
DJALOSHI QË KËRKONTE
LUMTURINË E VIZATON
HËNËN
Nganjëherë përrallat bisedojnë
nëpër rafte me shoqet e veta
ujkun shpeshherë e merr gjumi
afër deleve
Borëbardha nganjëherë u tregon
kashelasha dhelprave
kur flenë pulat
djaloshi që kërkonte lumturinë
e vizaton hënën
gjelat pak bëjnë gjumë
I KAM SHOQE
TË KËMBËVE
Unë flas edhe me pemë
unë flas edhe me miza
unë flas edhe me gjethe
unë flas edhe me pula
i kam thënë një ditë
një këmishe: të dua
i kam treguar edhe makinës
së larjes edhe diellit
unë bisedoj edhe me këpucë
i kam shoqe të këmbëve
nuk më intereson askush
çka thotë për mua
I KAM BEFASUAR
SHELGJET DHE
DALLËNDYSHET
E kam befasuar lumin dhe
shelgjet e buta
më ka zënë gjumi me një
fotografi të vogël në dorë
askush nuk më ka zgjuar
i kam befasuar edhe
dallëndyshet
që kanë fluturuar
mbi faqen time
nuk di pse e shoh një YLL
gjithmonë në ëndërr
nganjëherë m’i numëron
lulet në fustan
më pëlqejnë ëndrrat nën degët
me pemë
SIGURISHT KA
SHKUAR TË KËNDOJË
Dje ia hapa derën e kafazit
një bilbili
u gëzuan shumë
të gjitha vjershat e të gjitha
pemët u gëzua
edhe Lena e vogël
sot dita m’u duk shumë
më e mirë
edhe makina e shkrimit
e dhoma
një vajzë më tha se e ka
parë te një përmendore
me lule
sigurisht ka shkuar
të këndojë
99% e ka parë edhe dielli
UNË DI PAK + KAM
HUNDË TË VOGËL
Unë di pak sepse kam
këmbë të vogla
unë di pak sepse kam
çantë të vogël
+ këmishë me pak pulla
unë di pak sepse kam
hundë të vogël
unë nuk di shumë
sepse jam në klasë
të tretë
kam këpucë të vogla
+ ha pak
MBRETIT I MUNGON
LUMURIA
Një xhemper i trashë
i duhet LEJLEKUT
për dimër
një qerre e verdhë i duhet
VJESHTËS për rrugë
një pasqyrë i duhet
MOLLËKUQES
për ditëlindje
kaprollit i duhet një pyll
me njëqind kroje
nuk di çka i duhet
mbretit kur të gjitha i ka
një vajzë krejt e bardhë
më ka thënë:
i mungon lumturia
NUK KAM BESUAR
SE SHTETI RREN
Në vitin 1945 na patën rrejtur
bukur
KUR TË KRYHET LUFTA
ajri do të jetë më i mirë
pemët do të jenë më të ëmbla
uji do të jetë krejt ndryshe
LIRI do të ketë edhe lopa
LIRI do të këtë edhe qeni
KREJT rrenë kishte QENË
më nuk do të përcillet
askush se çfarë flet e çka thotë
nuk kam besuar se
shTeTi rren bukur
NATA PREJ LETRE
Nuk më pëlqen nata
prej letre
as prej bore
nata me buzëqeshje
është elegante
me hënë në faqe
është e mirë për nëna
shtatzëna
dhe për nuse
mua më pëlqen
nata që këndon
NUK DI A EKZISTOJNË
ILAÇE PËR VJERSHA
Nganjëherë vjershat janë
të mërzitshme
kur mësuesja thotë
mësoni përmendsh
dhe në mëngjes i harron
nuk i dua vjershat që nuk janë
të mira
çka na duhen kur kanë mjegull
e kur kanë borë
është mirë të shkruhen
me mjaltë dhe me erë molle
nganjëherë na lodhet koka
prej tyre
nuk ka kuptim të shkojmë
të mjeku
për shkak të vjershave
nuk di edhe për vjersha
a ekzistojnë ilaçe
LULE MERITON
EDHE DORA
Nëna e meriton lulen
më të mirë
një lule nga hëna
një lule që këndon
një lule dielli
lule meritojnë edhe nënat
e pulëbardhave
edhe motrat e drenushave
lule meriton edhe dora
e një vjershe
e syri i një kaprolli
lule meriton
edhe faqja e Lules
DO TA KRIJOJ
YLBERIN MBI RE
Kur të shkoj në hënë
do të veshi këmishë
të argjendtë
dy molla do t’i ruaj
për princeshën e parë
dhe një unazë
me katër ngjyra
prej buzëqeshjeve
të saj
do të krijoj ylberin mbi re
zogjtë më të bukur
do t’i thërras në mëngjes
fluturat më të bukura
do t’i thërras në mesditë
me yje do të vallëzojmë
deri në mesnatë
Keine Kommentare:
Kommentar veröffentlichen